في كم سؤال محيرين نادو, وطلبت مني ومن كم شخص يجاوبو عليهن.
http://ing4leb.blogspot.com/2007/02/blog-post.html
وبما إنو الست نادو كتير غالية علي وما فيني إرفضلا طلب. هاي أجوبتي المفصلة وانشاالله كون رديت عليك متل ما بدك.
ما السبب الأساسي الذي دفعكم للهجرة وترك وطنكم؟
أنا كنت ضد الهجرة, وحتى ضد أنو الواحد يسافر برات لبنان للعمل. كنت كير متفائلة لما خلصت الحرب و كتير صدقت أنو الدولة الجديدة رح تتحسن. كنت صدق كل كلمة كان يقولا رفيق الحريري وقتا.
سنة 1999 كانت حالة لبنان صارت سوبر زفت و كان إلي ست سنين بشتغل بوظيفة كانو العالم يعملو 100 واسطة لياخدوها. بس ست سنين بنفس المركز و مافي مجال للتقدم إلا بالوسائل الخاصة, كان شي كتير محبط. خلصت شهادة وأخدت واحدة تانية, يعني طموحاتي كانت أكبر بكتير من مضيفة أرض, حتى لو كنت مثبتة!
وإذ إسرائيل بتضرب بيروت! جنيت, كفرت بلبنان, قلت إنو البلد ما ممكن ينصلح وأنا تاركي. هيك بلمحة بصر قلبت من النقيض للنقيض.أخدت شهادتي و بظرف شهر كنت بدبي.
بصراحة, ما كنت متوقعة إني ضل. كنت بعدني مصدقة إنو لبنان رح ينصلح, وبوقتا كان في طفرة أوتيلات ببيروت. قلتلا لماما, ست اشهر, ست اشهر بس بشتغل بأحسن أوتيل بالعالم و برجع. أيه ما عدت رجعت, كل سنة كانت تمرق علبنان أنحس من اللي قبلا....
هل تفكرون بالعودة؟
كتير فكرت بالرجعة. قبل مقتل الحريري كان عندي هدف إني إرجع علبنان و سوق لبنان سياحيا متل ما عم يعملو بدبي, حتى كل خطواتي المهنية كانت بهالإتجاه. ما كان حلم كان هدف وكنت قادرة إني حققو. للأسف اكتشفت إنو كان حلم.
بس لحديت تموز الماضي كنت مقررة إرجع قريبا. يعني دفشت مهنتي لصوب قطاع شي إنو ماشي بلبنان و فتشت على شغل. كنت مستعدة إرجع اليوم قبل بكرا
ولماذا؟
لأني ما تركت لبنان بخاطري. حاسي إنو في حدا دشرني... (دمعة)
إذا كان الجواب نعم فمتى؟
هلق الوضع اتغير بعد حرب تموز, مرة تانية كفرت بلبنان. مش عارفة إذا فورة متل فورتي سنة ال 99 ولا شو. بس بعرف إني رح استثمر بلبنان, بعدين رح شوف وين بدي كمل حياتي. بحس إنو الإستثمار بلبنان واجب, حتى لو كان مافي ربح أو حتىكان في خسارة, يعني متل ماأهلي إلن حق علي, كمان بلدي...
وإذا كان الجواب لا ما الذي يمنع من حدوث ذلك؟
طبعا الحالة الأمنية, مش السياسية ولا الإقتصادية... الأمنية
في فترة الأعياد كثير من المدونين اللبنانين عادوا الى لبنان للقاء الأهل والأصحاب للإحتفال معهم بالأعياد وفور رجوعهم. رأينا أول بوست يكتبونه هو الكلام عن الفترة التي أمضوها هناك. والجملة الأخيرة تكون "I miss home". فسؤالي لهم لماذا هذا الشوق لا يُستثمر في العودة والبقاء في لبنان؟
أنا كنت زعلانة من لبنان و قاصصتو! ما نزلت قصدا, آخدة موقف. بعرف ما بقدر طوّل... بس إنو
ما هي الأشياء التى وجدتموها وتعتبرونها في بلاد الأغتراب أفضل ممن هي عليه في لبنان؟
كتار يا نادو هالإشيا كتار.
هل أنتم سعيدون هناك؟
سعيدة كلمة كتير كبيرة , بس فيني قول مكتفية, بالإنكليزي ساتيسفايد أو كونتانت
هل تعتبر نفسك كفرد تستطيع المساعدة لنهوض لبنان إقتصادياً, ثقافياً وإجتماعياً؟ وكيف؟
مافي شك. بعد حرب تموز اكتشفت أنو وجودي برات لبنان ما بيقل أهمية عن و جودي داخلو وفيني كون عضو منتج و فعال وفيد وطني بكتير وسائل. المغتربين برات لبنان بيقدرو يحطو ضغط كتير كبير على الحكومات بالبلدان اللي عايشين فيا وبيدقدرو يساعدو كتير. هيدا غير إنو بيقدرو يضخو أموال و إستثمارات ويخلقو فرص عمل. تتعرفي مثلا إنو أنا كل شي بقدر اشتريه بلبنا ما بشتري هون. مش لأنو أرخص بس لأنو بفضل أصرف مصرياتي ببلدي.
على كل, شوفي مثلا اليهود شو عاملين. قسم قرر إنو يقعد بإسرائيل و يبني بلد هونيك و قسم قرر يساعد من المكان اللي هني فيه. بالنتيجة قدرو يسيطرو على أكبر دولة بالعالم عن طريق عملن وخدمتن لهالبلد, مش بعصا ساحر, اشتغلو! وأنا كمان فيني إشتغل وأعمل نفس الشي. ومش رح خاف من التعصب ضد العرب, لانو اليهود كمان كانو العالم يكرهوهم و قدرو بعملن المتواصل يقلبو الآية.
ثقافيا, أنا بعتقد إنو نحنا بعصر ما في حدود للعطاء الثقافي ضمن بلد. بس للأسف إجتماعيا بلاقيها شوي صعبة
الى من توجه إصبع الإتهام بالنسبة للوضع الحالي في لبنان؟
بدون تعليق
هل تضع لبنان على سلم أولويتك واهتمامتك؟
ما في شك. دغري بعد العيلة.
فرص العمل في لبنان قليلة وهذا ما يؤدي بالشباب اللبناني للهجرة وترك الوطن؟ كيف بإمكاننا نحن الشعب (المواطنين) على تخطي مشكلة كهذه؟
صعبة يا نادو صعبة. بس فينا نحول الهجرة من هجرة دائمة لهجرة مؤقتة. بالحقيقة لبنان مبني عالهجرة من زمان وجر, وكمان بالحقيقة إنو اللبنانية بيساهمو كتير ببناء البلدان اللي بيروحولا من إيام أليسار. نحنا شعب زكي, محبوب وشغيل, وفي عنا نوابغ كتير. من بعد ما شفت
ولمست بإيدي قديش بقدر قدم لبلدي وأنا برا حسيت إنو الهجرة المؤقتة بتبني البلد وبتساعدو كتير.
أريد من كل شخص أن يقدم فكرة برأيه من الممكن أن تساعد على تحسن الوضع الإقتصادي في لبنان
الإستثمار بلبنان, الإستثمار بلبنان, الإستثمار بلبنان
السؤال الأخير, بالنسبة لكم, ما هو الوطن؟ هل المكان الذي ولد فيه الفرد, أم المكان الذي يجد نفسه به أم المكان الذي يؤمن له الوسائل الأساسية للعيش الكريم (العمل الراحة الأمان)؟؟
الوطن هو لبنان وبس, هيك بلا فلسفة
On a sunny day - Jan 07
